![](https://uraebashkuar.com/wp-content/uploads/2021/01/image-7.png)
Shkruan Emin Z. Emini
GËMUSHË E JASEMINTË
dhe fryu juga e dettë
zgjati duart e ngrohta
gishtrinjtë prej ere
thellë i fyti në flokët e saj të qelibartë
kokën e bukur ia ktheu në gëmushë të bukur
dhe
aromë e jasemintë ra mbi botë
i dehur
vrapova përgjatë bregut të adriatikut
erë çmendurake të bëhem
e të kthehem në krehër
moirë
PËRQAFIMI I HAPAVE
rërës së lagur të plazhit
lije gjurmët e hapave
flokëlidhur këmbëzbathur
vrapoje
diellin ta prekje me dorë
të shtriheshe në prarimin e kuqërremtë
mes detit e qiellit
nga ana tjetër e detit
të shikoja
pikturë
me bojëra të zotit
pastaj
hapat prej pulëbardheje
vala e qetë i mori në gji
dhe
përqafova detin
moirë