(Sipas një gojëdhëne arbëreshe, qe e shtunë ajo ditë kur nisi shpërngulja e tyre për në Italinë e andejdetit)
Nga Emin z Emini
MALLKIM ARBËRESH
si sot
qe e shtunë ajo ditë
nuk doja të ikja pa ty
pa qepikët e tu të zez’
as ta lija ullirin e shtëpisë
vaj t’i pikojnë sytë
në vetminë mijëvjeçare
por e bëra
e bëra
kokën në trastë
hijen mbi shpinë
kah sytë këmbët
braktisa gjithçka
veten braktisa
kaptova fusha e male
dhe një det
një det ndërmjet
të dielen
nën një re të huaj të një qielli të huaj
shkova në një kishë të huaj
te një zot i huaj
u luta me kripë në sy
për ty
arbëri
nga libri i mallkimeve dënesa psalmin
të gjitha të shtunat ardhshin
sall ajo e shtunë
mos ardhtë kurrë.